Imyidagaduro
Trending

Mu mafoto Skizzy wahoze muri KGB yasezeranye imbere y’amategeko.

Kuri uyu wa Gatanu tariki 26 Werurwe 2021, Umuhanzi Rurangwa Gaston uzwi ku izina rya Mr Skizzy, yasezeranye imbere y’amategeko na Nkundabose Clémence bamaze umwaka urenga bakundana.

Ni umuhango wabereye ku Biro by’Umurenge wa Gisozi, nyuma y’ibyumweru bibiri gusa aba bombi bemeranyije kubana akaramata.

Skizzy wamamaye mu itsinda rya KGB, ni umwe mu banyamakuru bagize uruhare mu iterambere ry’imyidagaduro mu Rwanda.

Ku wa Gatandatu tariki 13 Werurwe 2021, ni bwo Skizzy yatunguye umukunzi we amusaba kwemera kuzamubera umufasha, undi na we nta kuzuyaza arabyemera atega urutoki amwambika impeta ishimangira ikimenyetso kuri iryo sezerano.

Uyu muhanzi yavuze ko ubukwe bwe buzaba bitewe n’ibihe igihugu kirimo byo kwirinda ikwirakwira rya Covid-19, bityo ko atahita atangaza amatariki ahamye.

Skizzy yatangiye kumenyekana mu muziki ubwo yari mu itsinda rya Cool Family nk’umwe mu baririmbyi cyane ko ryari rizwiho kubyina.

Iri tsinda ryaje guhura na nyakwigendera Hirwa Henry, biba akarusho kuko bose banigaga hamwe. Nyuma yo guhura bakibonamo impano yo gukora umuziki, baganirije MYP wari inshuti yabo bafata icyemezo cyo gukora itsinda bise KGB-Kigali Boyz.

Indirimbo ya mbere bashyize hanze yitwaga “Abakobwa b’i Kigali”, bayisohoye mu 2003. Mu 2012 ni bwo Hirwa Henry yitabye Imana, nyuma y’indirimbo hafi 30 bari bamaze gusohora.

Nyuma y’urupfu rwa Hirwa Henry, MYP yagiye gukomereza ubuzima muri Leta Zunze Ubumwe za Amerika, biba nk’ibiciye intege iri tsinda burundu.

Skizzy wari usanzwe ari n’umunyamakuru, yakomeje umwuga w’itangazamakuru ariko akarivanga n’ibindi bikorwa binyuranye. Kugeza ubu asigaye ari umukozi muri Skol Rwanda

Ibitekerezo

  1. Oooh.. byiza cyane mon fils.. Nyagasani azabubakire rugume.. turabishimiye kandi turabakunda cyane.✍

Leave a Reply

Your email address will not be published. Required fields are marked *

Back to top button

Adblock Detected

Close or Pause AdBlocker before Using this site